Zwolle

Iej ligt a eeuwen doar an Iessel.
Oew oale meuje Hanzestad.
En met oew slingerende grachten. Diej,t Zwolle in zien aarm umvat.

Doar lag de Diezer en de Sasserpoorte.
Roondum oew oale vestingstad.
Woar goeje haandel wun bedreven.
ok op oew plein bin in oew hat.

Zwolle hef deftige oale huuzen.
In jugenstiel mangs op ebouwd.
As ik zoo waandel deur oew stroaten.
Wat bin iej miej dan zo vetrouwd.

En in oew hatte stiet de Pepperbusse
Ziej hef a eeuwen doar estoan.
En wil iej Zwolle van boam bekieken.
Dan muj heur trappen eem op goan.

Doar is ok de Sint Michaelskarke.
Opvallend met heur meuj portoal.
En ok de Dominicanerklooster.
Het stiet ter noew nog aolemoal.

Zwolle git vedan
in de vaart der volk’n.
Een stad an raand van Sallaands laand.
Woar Meansen leaft zoo met mekare.
Met leu van elken rang en staand.